Merkadu Foun iha Same Inagura husi Ministro MAEOT

Notisias

Merkadu Foun iha Same Inagura husi Ministro MAEOT

Komunikadu de Imprensa, 24 Fevereiru 2009
Download Komunikadu iha Formatu PDF

Vendedores iha Merkadu Same hetan konstrusaun uma merkadu foun iha Sesta, loron 20 fulan Fevereiru, ho serimónia inaugurasaun ne’ebé partisipa husi Sua Exelénsia Ministro da Administração Estatal e Ordenamento do Território Arcângelo Leite. Uma merkadu ne’e entrega ba Komité Jestaun Merkadu Same husi Asembleia Distritu Manufahi, ne’ebé aloka fundus atu harii merkadu foun ne’e husi orsamentu ba Programa Dezenvolvimentu Lokál iha tinan 2008.

Durante ninia intervensaun, Ministro Leite esplika katak merkadu ida ne’e harii liu husi serbisu komunidade no ofisiál iha Manufahi. “Ministerio da Administração Estatal hahú Programa Dezenvolvimentu Lokal iha tinan 2005. Programa ida ne’e Ministerio ninian, no orsamentu mós aloka husi Ministerio, maibé programa ida ne’e uniku no foun, tanba komunidade sira maka halo planu no hola desizaun rasik kona-ba orsamentu ne’e. Governo sentrál nunka, no la halo intervensaun,” hatenten Dr. Leite.

Programa Dezenvolvimentu Lokál maka estabelese asembleia lokál, no fó kbiit atu aloka no jere orsamentu anuál ba projetu infraestrutura. Proposta ba projetu ne’ebé hato’o husi komunidade ka setor departamentu iha distritu ne’e, no depois halo revista tékniku, asembleia vota ba projetu saida maka atu halo bazea ba prioridade distritu.

Merkadu identifika hanesan prioridade tanba fatin ne’ebé iha merkadu ne’e la to’o ba ema ne’ebé hakarak fa’an sasán iha ne’ebá. “Komunidade balun hatete dehan, fa’an iha loron laran, balun hatete dehan fa’an iha udan laran, balun hatete fa’an fatin laiha. Ida ne’e maka agora daudaun Ita responde uitoan-uitoan,” hatete Ofisiál Dezenvolvimentu Distritu Sr. Jose A. da C. Braz durante serimónia inaugurasaun.
Sra. Alcina da Costa, vendedora ida iha Merkadu Same, mós hateten katak merkadu foun maka importante ba vendadores sira. “Ami nia fatin laiha, entaun ami buka moris iha estrada ibun de’it. Sira halo merkadu ida ne’e tanba ida ne’ebá [merkadu tuan] la luan, entaun sira halo tan ida ne’e atu aumenta tan ida ne’ebá,” hateten Sra. Costa.

Durante serimónia inaugurasaun, Sr. Ministo Leite esplika katak Programa Dezenvolvimentu Lokál labele haree de’it husi aspektu projetu, maibé tenke haree liu ba ninia prosedimentu no mekanizmu atu hola desizaun. “Programa ida ne’e hanesan pratika ida ba desentralizasaun iha aspektu ki’ik oan ida, liu husi aspektu planeamentu husi kraik, oinsá ita halo proposta no hola desizaun. Ba Ministerio da Administração Estatal importante maka programa ida ne’e involve partisipasaun maximu husi komunidade liu husi sira nia lideransa lokál. Liu husi sira nia partisipasaun ita haree saida maka urjente, atu responde ba sira nia nesesidades,” hatete Sr. Ministro.

“Maluk sira iha Manufahi dala ida tan hatudu ba ema hotu, liuliu ba Governo, katak ho valor orsamentu ne’ebé limitadu, Ita Boot sira bele halo projetu ida ne’ebé fó benefísiu ba ema barak, no ho kualidade di’ak. Ba oin, kuandu Governo atu hahú ona implementa desentralizasaun, iha aspektu planeamentu no jestaun orsamentu, imi hatudu ona sinál pozitivu,” hatutan Dr. Leite.

Iha tinan 2008, Distritu Manufahi hetan orsamentu ho total US $177,000, ne’ebé sira aloka ba projetu hamutuk 16, no ida maka merkadu iha Same. Investimentu ne’ebé sira deside iha 2008 maka halai liu ba setor edukasaun (34%), estrada no irrigasaun (25%), merkadu (20%), agrikultura (13%), no projetu seluk (8%).

REMATA.

Atu hetan tan informasaun, favor kontaktu Sr. Joao Santos liu husi 729 4824 ka Sra. Sally Torbert liu husi telefone 731 4930.