Notisias

Notisias

Governu Halo Konsultasaun ba Ezbosu Lei 3 kona-ba Governasaun Lokál

Komunidadu, 18 Novembru 2008

Governu hakarak involve ema hotu atu kontribui sira nia hanoin ba lei hodi reforma Governu Lokál, liu husi dalan hala’o konsultasaun. Director Nacional de Dezenvolvimento Local e Ordenamento do Territorio (DNDLOT) Sr. Miguel P. de Carvalho hamutuk ho ekipa tékniku husi Ministériu de Administrasaun Estatal e Ordenamento do Territorio sei hale’u distritu hotu hodi halo konsultasaun kona-ba Ezbosu Lei Governu Lokál, Lei Divizaun Administrativu Territorial no ezbosu Lei Eleisaun Munisípiu hodi rekolha hanoin husi autoridade lokál, lider kumunitáriu, sosiedade sivíl no mós ba komunidade iha nivel lokál kona-ba proposta lei ne’ebé refere.
Señór diretór DNDLOT esplika kona-ba importánsia husi konsultasaun ne’e. “Konsultasaun ida ne’e Governu maka halo ho hanoin atu involve ema hotu iha prosesu ida ne’e hodi akumula hanoin, sujestaun, komentáriu ka preokupasaun husi ema hotu, atu nune’e bele hadi’a liu tan ezbosu lei tolu ne’e antes Parlamentu Nasionál aprova,” Sr. Diretór hato’o durante nia diskursu iha Manatuto iha loron 11 Novembru 2008.

Durante konsultasaun iha Liquica iha loron 14 Novembru, Domingos dos Santos, Juventude ida fó nia hanoin kona-ba importánsia husi konsultasaun ne’e. “Iha prosesu konsultasaun ne’e importante tebes atu ema hotu bele fó nia hanoin, saida maka di’ak liu atu inklui iha lei ne’e, tanba iha futuru lei tolu ne’e maka sei regula lala’ok husi munisípiu, ita lakohi to’o ikus mai lei ne’e aprova tiha maka ita foin ko’alia katak lei ne’e la los, maibé ida los ne’e labele hatama tanba ne’e tarde ona, ita hakarak atu lei ne’e bele garantia munisípiu aban bain rua bele funsiona ho di’ak atu nune’e dezenvolvimentu bele la’o di’ak duke agora,” Sr. Domingos hateten lia hirak ne’e hafoin konsultasaun, nia mós husu atu governu bele involve ema intelektuál sira hodi kontribui sira nia hanoin kona-ba lei ne’ebé refere.
“Ami haksolok tebes ho ezbosu lei tolu ne’e, maski sei iha buat balun ke seidauk akumula hotu maibé ida ne’e di’ak atu ita bele hahú hakat ona ba dalan desentralizasaun, buat ne’ebé sei falta ita sei hadi’a importante liu maka ita tenki hahú hodi estabelese munisípiu bazeia ba ezbosu lei tolu ne’e, kuandu ita hala’o ona maka ita sei haree fali, sei la nune’e ita nunka bele hakat ba oin,” haktuir Sr. Rui Gomes, Administradór Sub-Distritu Natarbora, hafoin konsultasaun.

Durante prosesu konsultasaun preokupasaun ne’ebé partisipante sira foti maka hanesan prosesu ba eleisaun, fundus ba suku nian, relasaun suku ho munisípiu no fronteira suku.

Lei 3 ne’e maka sai hanesan kuadru legál ba desentralizasaun ne’ebé sei muda serbisu governu nian besik liu ba povu no haforsa komunidade lokál ho rekursu hodi responde ba nesesidade dezenvolvimentu iha nivel lokál.
REMATA.
Atu hetan tan informasaun, favor kontaktu Sr. Joao Santos liu husi 729 4824 Sra. Sally Torbert liu husi telefone 731 4930.