DNAL halo pagamentu 10 % ba rehabilitasaun sedé de Suco

Notisias

DNAL halo pagamentu 10 % ba rehabilitasaun sedé de Suco

Projetu rehabilitasaun sedé do Suco hamutuk 100 ne’ebé hala’o husi Direcção Nacional da Administração Local (DANAL), oras ne’e tama ona iha fase pagamentu 10 % husi kusto rehabilitasaun. Kusto rehabilitasaun ne’e variabel hahú husi $ 1.181 to’o US $ 5.428,20 amerikanu husi sedé Suco ida ba sedé Suco seluk konforme avaliasaun husi tékniku sira kona-ba estragu ne’ebé Suco ne’e hetan. Montante ba rehabilitasaun ne’e hamutuk $ 347.390.29 husi ano fiscal 2008/2009.

Rehabilitasaun sedé Suco ida ne’e nia objetivu atu hadi’a kondisaun sedé Suco di’ak liu tan tanba sedé Suco mak sai hanesan fatin ba chefe suco hodi hala’o sira nia servisu ho di’ak hodi responde komunidade nia ejijensia liu-liu iha area administrasaun. Rehabilitasaun ne’e nu’udar projetu ida ki’ik ne’ebé governo fó konfiansa ba komunidade atu jere rasik nia orsamentu hodi nune’e bele insentiva komunidade iha dezenvolvimentu ba sira nia suco laran.

Durante rehabilitasaun hala’o komunidade sira mak involve direita iha prosesu tomak, ida ne’e hatudu katak komunidade sira iha boa vontade di’ak atu partisipa iha dezenvolvimentu suco mézmuke sira rasik enfrenta preokupasaun barak iha sira nia suco.