MAEOT Hala'o Konsultasaun Planu Estratéjia ba Tinan 5

Notisias

MAEOT Hala'o Konsultasaun Planu Estratéjia ba Tinan 5

Ministério da Administração Estatal e Ordenamento do Território (MAEOT) hala'o Sorumutu kona-ba konsultasaun planu estratéjia ministériu ninian ba tinan 2010-2015, objetivu husi atividade ne’e atu hetan hanoin kle’an liu kona-ba asaun saida mak MAEOT atu hala'o iha tinan 5 mai. Sorumutu ida ne’e hala'o iha Canossa Has Laran, Comoro-Dili, loron 15 Fulan Setembru 2009.

MAEOT iha papél importante atu dezenvolve polítika progresu Administrativu governo ninian iha ita nia nasaun. "MAEOT hanesan xave ida atu fó garantia ba reforma administrativa hodi atinzi boa Governasaun iha Timor-Leste", hato’o Sr. Ministru MAEOT, Dr. Arcângelo Leite, durante nia diskursu iha abertura sorumutu.

Segundu Vice Primeiru Ministru (PM) Assunto de Gestão e Administração, Ir. Mário Viegas Carráscalao, ne’ebé prezensa iha sorumutu konsultasaun ne’e hato’o nia hanoin katak: “Desentralizasaun mak hanesan parte importante tebes ba ita atu reforma administrativa", haktuir Sr. Mário. Sr. segundu Vice PM mós especta katak desentralizasaun bele realiza iha tempu besik karik lei Governo lokál aprova iha Parlamentu Nasionál iha tempo badak nia laran.

Durante Sorumutu konsultasaun ba planu estratéjiku ministériu ninian, diskusaun kle’an liu kona-ba área importante sá deit maka hanesan konsiderasaun estratéjiku iha desentralizasaun, iha aspektu sosiál ekonomia, define funsaun governo sentrál ho governo lokál la’o oin-sá, papél MAEOT ninian karik aban bainrua estabelese Munisípiu, prosesu desentralizasaun iha programa polítika deskonsentrasaun orsamentu no responsabilidade ba Implementasaun, kordenasaun entre Ministériu, MAEOT no Munisípiu, no prinsípiu boa Governasaun ba iha futuru.

Kuaze partisipantes 150 partisipa Iha Sorumutu konsultasaun planu estratéjia ne’e kompostu husi Ministériu relevante, Administradór Distritus, ajénsia Internasionál husi Nasaun Unidas, NGO Internasionál ho NGO ne’ebé hanesan parseiru ba dezenvolvimentu iha Nasaun Timor Leste.