Povu Suco Leohitu Sente Kontente ho Programa Dezenvolvimentu Lokál

Notisias

Povu Suco Leohitu Sente Kontente ho Programa Dezenvolvimentu Lokál

Iha loron 23 fulan Jullu 2009 ekipa tékniku husi Direcção Nacionál Dezenvolvimento Local e Ordenamentu do Territoriu (DNDLOT) husi Ministério da Administração Estatal e Ordenamento do Territorio (MAE-OT) hala’o vizita servisu iha Sub-Distritu Balibó, Distritu Bobonaro. Objetivu husi atividade ida ne’e atu rekolha informasaun no monitoriza atividade kona-ba programa dezenvolvimentu lokál.

Durante dada lia, komunidade aldeia Ferik katuas, Suco Leohitu, Sub-Distritu Balibó hato’o katak Programa Dezenvolvimentu Lokál tama iha sira nia suco hahú iha 2007 to’o agora.

Projetu balun hala’o ramata mak hanesan ponte ki’ik 5 iha estrada area rurais husi Leohitu ba Balibó, Rehabilitasaun no konstrusaun uma Eskola Presekundaria, ho dada be mós ba komunidade. Projetu 2009 iha aldeia ida ne’e mak halo konstrusaun baleta no bee dalan, planu programa aldeia ida ne’e ba tinan 2010 tama ona iha verifikasaun Sub-Distritu Balibo.

Estrada buat ida ne’ebé importante ba povu iha area rurais, ho kondisaun estrada diak bele asesu ba Mercado no fa’an sira nia produtu lokál ba iha negosiante sira. “Antes programa dezenvolvimentu lokál tama, bailoro hanesan ne’e transporte bele ba mai, maibé tempu udan labele ba mai, motor deit mós labele liu tanba estrada be sobu hotu”, hatete Francisco Muti Martins, Komunidade husi Aldeia ferik Katuas. “Depois programa ida ne’e tama halo ponte ki’ik no be dalan, udan boot mós ami bele asesu transporte hodi fasilita ami nia produtu lokál hanesan malus ho fore mungu ba iha Mercado”, nia haktuir.

Komunidade iha Aiassa, Suco Leohitu, Sub-Distritu Balibó sente haksolok ho programa governo liu husi Programa dezenvolvimentu Lokál ne’ebé oras ne’e lao iha sira nia let liuliu kona-ba be mos. “Uluk ami kuru be hemu ho distánsia kuaze metru atus lima resin nia laran” haktuir Raimundo Soares, hanesan benefisiáriu be mós iha Aldeia ne’ebé refere. “Maibé agora ami sente kontente tanba ami bele kuru be iha ami nia aldeia laran”, nia hatete, wainhira dada lia hamutuk.

Raimundo mós hatete katak programa Governo ne’ebé tama iha sira nia aldeia hanesan murak ida ba sira no komunidade tomak tanba ne’e sira prontu atu tau matan, kuidadu no halo manutensaun tuir sira nia konxiénsia rasik, hodi nune’e sira bele utiliza rezultadu projetu ne’e iha tempo naruk nia laran.