Prezidente da Republika vizita gabinete STAE

Notisias

Prezidente da Republika vizita gabinete STAE

Iha loron 13 Jullu, Prezidente da Republika Dr, José Ramos Horta, halo vizita ba gabinete STAE. Durante vizita ne’e Dr. Ramos-Horta ko’alia katak Estadu Timor-Leste fó apoiu ba STAE hodi halo eleisaun xefi suku iha loron 9 Outubro 2009.

“Estado ho orgaun soberania tomak fó apoio 100% ba STAE atu assegura prosesu eleisaun imparsial, independente no transparente hodi nune’e komunidade internasionál ho nasionál bele iha konfiansa nafatin hodi kria cultura Demokrasia iha ita nia rai laran", hateten Dr. Ramos-Horta.

Prezidente mós encoraza funsionariu sira STAE atu halo serbisu ho imparsialidade hodi uza kompetensia, responsabilidade no kredibilidade.

Vizita ne’e simu husi Sr. Tomás do Rosário Cabral, Diretór STAE, no marka prezensa mós husi Ministro da Administração Estatal e Ordenamento do Território, Dr Arcângelo Leite.

Iha soromutu ne’e Sr. Ministro informa katak orgaun estadu fó konfiansa totál ba STAE atu hala’o nia knaár ho di’ak, atu nune’e prosesu eleisaun xefi suku iha tinan 2009 bele la’o ho di’ak no susesu. Ministro mós afirma katak pozisaun Governu nafatin sei la interfere serbisu STAE nian kona-ba prosesu eleisaun ne’e.

Dr. Arcângelo Leite akresenta liu tan katak iha ema barak sei mak duvida kona-ba kapasidade Timor oan nian. Maibé atraves husi esperensia barak ne’ebe durante eleisaun husi 2001 toó 2007 bele sai hanesan mestri bo’ot ida atu hadi’a di’ak liu tan serbisu STAE nian.

“Importansia ba eleisaun ida ne’e maka atu hetan rezultadu ne’ebe iha kredibilidade hodi bele evita manipulasaun atu nune’e povu fiar no fó konfiansa nafatin mai STAE", hateten Sr. Ministro.