DNDLOT Hala’o Sorumutu Regular ho Ofisiál Distritu

Notisias

DNDLOT Hala’o Sorumutu Regular ho Ofisiál Distritu

Iha loron 15 Jullu 2009, Direcção Nacionál Dezenvolvimento Local e Ordenamentu do Território (DNDLOT) husi Ministerio da Administração Estatal e Ordenamento do Territorio (MAE-OT), hala’o sorumutu regular ho Ofisiál Dezenvolvimentu Distritu (ODD) no Ofisiál Finansas Distritu (OFD) husi distritu 8 ne’ebé implementa pilotu Programa Dezenvolvimentu Lokál (PDL). Objetivu husi sorumutu ne’e oinsá bele hetan informasaun husi ofisiál distritu sira kona-ba relatóriu progresu implementasaun projetu 2008/2009 no aprezenta planeamentu 2010 kona-ba programa dezenvolvimentu lokál.

Sr. Miguel Pereira de Carvalho, Diretór DNDLOT, ne’ebé lidera diskusaun ne’e hateten katak, “programa ne’ebé agora hala’o iha PDL, sei utiliza iha munisípiu nia laran tanba ne’e presiza kooperasaun no involve ofisiais ho komponenti hotu iha distritu, tanba programa ida ne’e hanesan pasu importante ba distritu sira atu simu polítika desentralizasaun liu husi implementasaun munisípiu iha 2010 mai'.

Durante sorumutu ne’e Sra. Susanne Kuehn, Xefe Konsellu Tékniku ba Programa Apoiu Governasaun Lokál, fó nia hanoin katak, “sorumutu ne’e importante hodi bele troka ideia no hanoin ba malu kona-ba programa PDL ne’ebé agora la’o iha distritu 8 nia laran, liu-liu ba preparasaun kona-ba estabelemenentu munisípiu, PDL sei sai esensiál hodi suporta tranzisaun distritu ba munisípiu' haktuir Susanne.

Iha aprezentasaun relatóriu husi ofisiál distritu katak projetu PDL tinan fiskál 2008, maioria finalize ona, ba projetu 2009 nian oras ne’e daudaun balu ramata ona no balu sei iha prosesu implementasaun nia laran. Planu prioridade projetu ba 2010 distritu balu difini ona no distritu balu sei iha prosesu verifikasaun nia laran.

Ofisiál distritu sira mós fahe informasaun ba malu kona-ba implementasaun PDL iha distritu pilotu 8, hanesan meus ida hodi hasa’e koinhesemetu no bele transfere matenek no esperensia ba implementasaun projetu PDL. Ofisiál sira rekomenda ba MAE-OT atu fó nafatin kbiit ba ofisiál finansa ho tékniku sira liu husi formasaun ruma hodi nune’e bele dezenvolve sira nia kapasidade no bele aplika iha area ne’ebé sira serbisu ba.

Ho esperensia ne’ebé hetan husi programa PDL hanesan lesaun ida hodi implementa iha munisípiu, hodi difini no dezenvolve rasik tuir nesesidade populasaun iha nivel lokál tanba ne’e presiza kontribuisaun no partisipasaun husi ema hotu hodi dezenvolve Ita Nia Munisipiu iha futuru, hodi bele atinzi dezenvolvimentu nasionál iha Timor-Leste.