Embaixadór Cuba ba Timor Leste halo Vizita Kortesia ba MAEOT

Notisias

Embaixadór Cuba ba Timor Leste halo Vizita Kortesia ba MAEOT

Komunikadu de Imprensa, 13 Marsu 2009

Embaixador Cuba ba Timor Leste Sr. Ramon Hernandez akonpañado husi Sr. José Manuel Liera Garcia, nudar koordenador alfabetizasaun iha Timor Leste, iha kinta–feira 12 de Março de 2009, hala’o visita de kortesia ba Ministerio da Administração Estatal e Ordenamento do Território.

Vizita de kortesia embaixadór Cuba ne’e simu diretamente husi Ministro da Administração Estatal e Ordenamento do Território, Dr. Arcângelo Leite, iha nia Gabineti, ho objetivu hanesan solidariedade husi governo Cuba liu husi nia reprezentante iha Timor Leste.

Iha vizita ne’e Ministro MAEOT hato’o nia apresentsaun badak kona ba servisu ministerio nia, durante governasaun AMP, liu-liu kona ba preparasaun eleisaun suko no Munisípiu.

Iha parte seluk, embaixadór Cuba Sr. Ramon Hernandez, esplika mós knar embaixadór Cuba nia iha Timor Leste ne’ebé atu fó apoiu ba governo Timor Leste atu bele dezenvolve lailais, tanba Timor Leste hanesan nasaun foun ida ne’ebé foin hetan nia independénsia iha 2002 sei presiza apoiu barak husi nasaun seluk.

Relasiona ho programa nasionál de alfabetizasaun, governo Cuba haruka nia professores 36 ne’ebé oras ne’e koloka iha 13 distritu atu fó apoiu ba programa ne’e. Atu hetan susesu ba programa ne’e Sr. Ramon Hernandez husu apoiu ba MAEOT atu tulun halo kampaña Nasionál de Alfabetizasaun iha base liu husi Administradores distritu, sub distritu, chefe sukos e aldeias, nune’e komunidade bele partisipa ativa iha programa ne’e. Embaixadór hateten katak iha distritu balun autoridade lokais sira ladún fó importánsia ba programa ne’e, nune’e partisipasaun komunidade mínimu tebetebes. Maibé iha distritu balun administradores distritu fó apoiu maka’as ba programa nasionál de alfabetizasaun ne’e, hanesan distritu Aileu programa ne’e, la’o ho susesu.

Tuir informasaun ne’ebé Departamentu Komunikasaun Social MAEOT nia hetan husi Administradores distritu Liquiçá Sr. Leonel de Jesus Carvalho kona-ba lamentasaun husi Embaixadór Cuba nia, Administrador ne’e hateten katak la’ós autoridade lokál sira la fó importánsia ba susesu programa nasionál de alfabetizasaun ne’e, maibé falhansu ne’e mai husi falta de koordenasaun servisu, nia espera katak iha tempo oin mai falhansu ne’e labele akontese tan, nune’e planu servisu ne’ebé iha bele la’o ho di’ak.

Responde ba pedidu de apoiu husi embaixadór Cuba ne’e, Ministro da Administração Estatal e Ordenamento do Território, Dr. Arcângelo Leite promete atu fó ordem ba distritu to’o sukos atu bele fó apoiu masimu ba programa nasionál de alfabetizasaun, nune’e komunidade barak maka bele livre husi analfabetizasaun.

REMATA.

Atu hetan liu tan informasaun bele kontaktu ho :
Sr. Sebastião Pereira, Hp.7357544