Notisias

Notisias

Diretór DNDLOT Aprezenta Sobre Desentralizasaun iha Seoul, Korea

Iha dia 14 & 15 Outubru 2008, iha Seoul, Korea, Director Nasionál de Desenvolvimento Local e Ordenamento do Territorio, Sr. Miguel Pereira de Carvalho, ba aprezenta Relatóriu de Estado Timor-Leste nian sobre “Reforma Desentralizasaun hodi Melhora Di’ak liu tan Prestasaun de Serbisu” iha Misaun Estudu sobre Governasaun Públiku ne’ebé mak partisipa husi nasaun 16 iha Asia-Pacifica.

Iha nia intervensaun, Director Miguel komesa ho fó esplikasaun kona-ba organizasaun estadu Timor-Leste nian tantu iha nivel nasionál no mós iha nivel lokál. Sr. Miguel esplika tuir mai kona-ba reforma kona-ba Governo Lokál no desentralizasaun iha Timor-Leste hanesan reforma boot ida ne’ebé mak Estado Timor-Leste halo atu nune’e bele fortifika tan instituisaun estadu Timor-Leste nian i parte importante liu mak atu hakbesik liu Governo iha komunidade atu nune’e bele melohora liu tan prestasaun de serbisu ba komunidade Timor-Leste nian.

Perguntas no mós sujestaun barak mak hato’o husi partisipante sira ba aprezentasaun Director Miguel nian. “Ha’u hanoin prosesu demokratizasaun iha Timor-Leste ne di’ak ona, maibé tenke haree mós esperiensa husi nasaun barak katak demokrasia tenke la’o tuir regras” hateten partisipante husi Indonesia nian Sr. Anwar Sanusi. Moderador ba workshop ne, ne’ebé mak mai husi Korea, Sr. Professor Jae MOON, apresia tebes reforma ne’ebé mak Timor-Leste halo mézmuke nasaun ida ne’ebé mak foun. Professor MOON hatutan liu tan katak: “Transformasaun governu husi organizasaun sentric ba iha komunidade sentrik hanesan buat ida ne’ebé mak importante hodi melhora prestasaun serbisu ba komunidade sira.”

Iha aprezentasaun relatóriu de Estado ne, Director Miguel de Carvalho, hamutuk ho partisipantes husi nasaun 16 ne’e, konsege troka esperiensa ba malu ne’ebé mak sei hatutun liu tan atraves husi kontaktu pesoál ne’ebé mak sira sei halo tuir mai. “Ba ha’u, hanesan nasaun ida ne’ebé mak foin hamriik, ita presiza estuda barak liu tan husi nasaun desenvolvidu no mós nasaun hirak ne’ebé mak iha hela fase dezenvolvimentu atu nune’e bele sai hanesan referénsia ba dezenvolvimentu iha ita nian rai” hateten Director Miguel.

Multi-Country misaun de estudus ne’e organiza husi OECD/Korea Policy Centre ne’ebé mak tinan-tinan konvida partisipantes husi mós Timor-Leste hodi ba diskute ho nasaun seluk kona-ba prestasaun serbisu ba komunidade husi funsionáriu estadu nian.